Sa sera prima de Sos Santos in logu nostru si usaiat, in balba a sas istrégas americanas, de si reunìre trà féminas mannas pro ‘andare a visitare sas domos de sas baianeddas. Si cantaiant muttos de onzi tzenia et cando si connoschiant fint cantados puru tzeltos versos in italianu et napoletanu. Sas cantaranas fint in possessu de una colvulitta bellessempre ‘ezza ma no istampada. Sa missione fit puru a iscopu umanitariu,… diffattis a sas cantones sighiant sos cùmbidos. Non b’aiant sos cicculates a manigare ma sa frutta sicca fit assigurada. Sas mamas de sas baianeddas ‘essiant a sa janna, offrende su chi s’accataiant in cussu momentu. Figu et castanza sicca, nughe, pabassa et sa prunalda, fruttura chi a die de oje non trattat piùs nisciùnu. Si coglìat cando fit bene cotta e si ponìat a siccare comente sa figu maseda :-Namus sa veridade! Su sapore no est su matessi ma, cando nd’amus gana andamus a sa buttèga et la comporamus a iscattulas, pront’ettottu! Nos las mandant da’e…su corru mannu ’e sa fulca, da ’e California, ma sempre pruna est! Et…si est approntada ‘e àtere, namus chi est bona su matessi! Sa die ‘e Sos Santos, sos omines andaìant da ‘e chintina in chintina a proare su ìnu nòu et sutzèdiat chi innanti ‘e ‘ustare sa cogogna fit sigura. Sa notte de Sos Moltos, sa padrona ‘e domo, prima de si colcare, lassaìat fora ‘e su balcone unu piattu de mànigu pro Sas Aminas Famidas, postu a banda innanti ‘e chenare in famìlia. Su piattu bell’e sempre fit bòidu a cando a su manzanu et...medas boltas non fint sas àminas solu a s ‘ attattare! Sos piseddutzos tzoccaìant sa jiannas de sas domos nende – pro sos Moltos moltos – et sos chi aberiant l’is daiant dulchittos fattos da’e sa massàja, figu sicca, nughe et méndula! In sa ‘idda mia “Padru” et in “Orgosolo” custa cirimonia pro sos piseddos si faghiat et si faghet tottora s’ultima die de s’annu mudende puru sas paraulas chi si naraint a donzi tzoccheddu, prontos cun su saccu a pala – a sa fita-fita – et chi-e rispondiat naraiat – a sa fita-fita, un’isculifitta, un’iscurriada…sa fita-fita…dada!
