Per i nostri lettori una nuova bellissima poesia in lingua sarda di Franco Piga:
Innotzentes Criaduras Tropu cosa at isfatu o at mudadu s’omine chi prosighit inchietu, cando laorat semenes de apretu in cussolzas, ch’at, miseras brujadu. E a pentumas noas e antigas paret chi currat, tristu e ismarridu, si puru, bene at connotu e l’at bidu, cal’est su frutu de gherras e brigas. Però sighin, annuzos e isfidas, a cumproare fortzas e podere; ch’esserat cussu su primu dovere chi maltzit in bideas presumidas. E in gherras, chi nudda ischin de paghe, che trazat innotzentes criaduras, a cumproare famine e bruturas in biddas reduidas in pedraghe. Pitzinnos chi no ischin o aprenden it’est amore o it’est su rispetu, orfanos, chentza pane e ne afetu ch’a manos nudas, su nudda difenden. E atentos la viven cust’Istoria ch’issos matessi, sufrinde an iscritu, e ischin chi su tempus at traìtu, dendelis solu famine e timoria. No isco si mi contat poesia su narrer cun sa pinna astrinta in manos, cumprendo chi sun debiles e vanos sos versos ch’essin da-e manu mia. Ma, no est vanu custu cundennare s’est boghe chi cun ateras s’aunit, e si signales de paghe reunit, chissà, chi chelfat Deus iscultare. E siat issu, Ispiritu clemente ch’idat de tantas lagrimas su dolu, dendelis cussa paghe e su consolu chi deghet a ogn’anima innotzente.
